جە ناکانە بە فیکێوە تەمامی مەی گەمەو عومری
ئەجەل ئامە , بە فووو مەرگی , مەکوشنۆوە شەمەو عومری
ئەچا ڕۆنە کە نا مەلمێ , ژیان دەشتێوە بێ ئاوەن
تەمەن تەژنەینە قڕ کەوتەن , تەمام وشکەن چەمەو عومری
ئەچا رۆنە سەرە کاسەن جە گرموو قاڵوو دەورانی
بە وەرمێوە سووکو ئارام , تەمامەن هەم هەمەو عومری
سەراسەر زندگیما خۆ دلێ دوودیو سیاوی لوا
نمەشۆ داخەم ناسش بینمێ , بە چەم ئاسۆ , تەمەو عومری
هەر با حەولو تەقالاما پەڕۆ کەردەو خەزانەی بۆ
جە ئاکامۆ دەسی هاڵی مەوەرمێ لێ همەو عومری
فرەما پیما سەرەو چێرەو دۆڵاو دۆڵوو کەشوو دنیەی
لەشەی مانیا بیەن پێتەک , دماو فرێوە رەمەو عومری
جگەم عشقیو وەشەسیایی , مەحەببەتو بێ ئازاری
قەبووڵ نمەوۆ حوکمەی تەری , جە قازی مەحکەمەو عومری
شوعەیب خالدی زاد
چ زندانێوەن برا گیان
ژیوای ئەچی وڵاتەنە
پەلەوەروو تامەزرۆیی
هەتا سەروو بانوو تاسەی
نمەتاوۆ گێرۆ باڵێ
شەقامێ چێنە
پەی ئاوات وازی
تا کووجیەو خەمی
بڕ مەکەرانێ
جە بێ بەزەیی
قرخەی تاڵشەن
سینەو گەردوونی
هونەر و جوانیو وەشەسیایی
ئنسانیەتوو مروڤایەتی
تەنیا مەتاوان
دێڕێ پەڕ کەران
پەی سەرکەوت بیەی
بە دەرد نموەران
با تۆ هەر بڕەمی
با تۆ هەر بناڵی
فایدەش چێشەن
تکەولاڵەمان
چێنە حاکموو پاییز پێوەرە
پەیمانشا بەسەن
جە یەک کاسەنە ئاوی موەرانێ
شەیتان و رەحمان ...
شوعەیب خالدی زاد
فرە خاست کەرد ئامەی گوڵم
یانەی چۆڵو سەرد و سرو بێ دەنگوباسم رازنات
کاشکەی زووتەر تۆ ئامایای
وەڵتەر چانەی شەوقو زەوقم ، هەستو نەستم
کەرو فەداو هیچ و پووچی
کاشکەی زووتەر سەرو راکێ تەنیایەکەیم دایبیات نشان
فرە خاس زانات و لەیەکت دا
ئەمن پەی تۆ ، تۆ پەی ئەمن
پێسەو سیپاڵێوە جوانخاسی
مەتاویەیمەی سەرو پۆسو یەکترینیرە
فرە خاس زانات و فرە خاس زانام
پێتەک پەی تۆ پێتەک پەی من
وێمانەنمێ ، وێمانەنمێ ...
شوعەیب خالدی زاد
( چۆپــی مه‌رگی )
دانێـش چـووری زقمــوو سـه‌رده‌ی ، تووڵـه‌و زلانـــوو زه‌ربه‌تیت
ڕۆسه‌موو زاڵیش دان زەمین ، گۆڵمه‌ی شه‌راوو شه‌ربه‌تیت
هـــه‌زار ده‌نگـێ زۆخیش سه‌رده‌ی ، سازت دلــێ ژیوایمه‌نــه
په‌ی دڵ وه‌شی گـرینگێـــوه ، نەومە ســه‌ر زوانوو به‌ربه‌تیت
وەلێم سووک بیــه‌ی لاو چه‌مانمــۆ ، پێســه‌و په‌لێـوه لێ وەینه
دنیا نەجمنێ وەختوو وێش ، کــۆڵــه‌کــێ سامـــوو هەیبه‌تیت
هه‌رچــن ئه‌سیر بیانــێ وه‌لـێ ، سه‌وه‌ی نۆگه‌و تۆن ئه‌سیری
چۆپــی مه‌رگی شادیانه‌شه‌ن ، وه‌ختـــوو زه‌ماننــه‌و غوربه‌تیت
خه‌رمان گۆڵـێ دڵیم کاڵــه‌ی ، پــه ی سـه‌یرانوو باخوو وەشیت
کــۆن بــه‌ربیانـــه‌ی گۆڵــێ دڵیـم ، جه خاکـوو بانــوو توربه‌تیت
شوعەیب خالدی زاد
مانگەو حەزی
هـۆ مانگه‌کێ حەزی بـۆ به‌ر ، که‌ره ڕۆشــن دنیاو ڕه‌شی
ئننـا چه‌نــه‌م جیــا بیــه‌نــۆوه ، وه‌یــوه‌و ســه‌ریاڵانــو وه‌شی
جه سه‌نگینی کۆڵو تاسه‌یت ، لاشه‌و مەنەیم مازیش مێڕیان
به چــۆبه‌سـو نازیت کـه‌ره‌ش ده‌وا مــازی مێــڕیاو له‌شی
شایــه‌د سه‌ختــی ڕا لێــژه‌کـێـت ، بتاوو جه ویـر به‌رونـۆوه
به‌ڵام وه‌روه‌ت نابیـرمه‌نه ، نمـه‌وی ئاوی ، جـه‌سـه‌ر نمه‌شی
به شوو ئه‌من جه مه‌ولوودیت ، بی مه‌حروومـوو وه‌شه ویسیت
ڕاسـه‌ن فه‌قیر هـه‌ر کرۆڵـه‌ن ، نمه‌گنــۆ وه‌روو پشکەو به‌شی
شوعەیب خالدی زاد
شعیب خالدی زاد
ئی شعرێمه به ر ئه‌ساسو
به‌یتێوه فولکلۆری نویسێنه که ماچۆ : (داراو نه‌ڏارا گر ماتی خه‌مه‌ن
دارا مه‌گره‌وۆ به‌شو من که‌مه‌ن )
داراو نه‌ڏارا »
دارا پچــی پــاســـه دڵت پــڕخــه‌مه‌ن
پچی مه‌لوله‌نی ، مه‌ر به‌شت که‌مه‌ن ؟
بــڏیه پـــه‌ی به‌شــو ژیــوه‌و نــه‌ڏاری
سه‌راسه‌ر پاییــز ، تاریکــــه‌ن تـه‌مه‌ن
خه‌مـــو خه‌فه‌تو مه‌ینه‌تو حــه‌سـره‌ت
لێ یانه‌یشه‌نه جمڵه‌شــــان جـه‌مه‌ن
ئه‌ر ساتـه‌ی وه‌ش بـۆ ساڵانو مانگش
ماباقـــی قوت و خـوراکش ســه‌مه‌ن
ته‌وێڵـــه‌و به‌ختیش نه‌وچاوش نیــه‌ن
به‌رئه‌ورده‌و نانێش به په‌له‌ن ، ڕه‌مه‌ن
پــه‌ی ساڕێــژبیه‌و کڵکڵه‌و خـــه‌میش
خه‌مبه‌ر که‌ره‌کـه‌ش فواره‌ی چه‌مه‌ن
ئــه‌ر دڵداریه‌نه ســۆته‌ی جـــه کار بۆ
نـــه‌ڏار سۆچیای بڵێســـه‌ی شه‌مه‌ن
ســـا دارا بیــاوی بــێ ئــه‌وه‌جه‌یـــی
دڵت تــه‌ژنه‌نــو هــه‌ر ئــه‌ورا لــه‌مه‌ن
با پەی هەژاری کۆڕەی جە ئابادی بگێرمێ
لانوو خەمی فڕە بەیمێو پەیشا شادی بگێرمێ
هەرگیز بەخەم لانمەشۆ چڵکوو شەوەو دێوەزمەی
مەر بە ئاسۆ رەشی زوڵموو بیدادی بگێرمێ
شوعەیب خالدی زاد
shoaib khaledizad // شعیب خالدی زاد ................
شوعەیب خالدی زاد
جە ناقڕەو گیریەو پەیزی پەی پەی دەنگوو وەهاری مەی
جە کۆرێ شینوو ئاخ لەیلی چەپڵە رێزانوو یاری مەی
وەڵادیموو هەرچی رەشیەن رۆشنایەن ئاشنایەن
شەوە مەوۆ دۆسوو سۆحی پرشنگەو رۆجیاری مەی
شوعەیب خالدی زاد
زوو مەویەرۆ تەمەن , ئازیز , بۆ هەناسە , جاوەش کەرە
جەسەی مانیای چەمەنواڕی لوتفوو یاری باوەش کەرە
تا نەکوشیان پرتەپرتوو چراوەو دڵی بە واو نەویەی
بە ماچێوە وشەسیایی کورپەو حەزی ساوەش کەرە
ئەوگار بیەن دڵم گوڵم ,ناوەش بیەن بە زامی عشق
ئەر مەیلت بۆ گرینگ نیەن ئەننەی تەرم ناوەش کەرە
بە جامێوە بە کامێوە بەنامێوە بە دامێوە
ئەمنی فەقیری بێ کەسی بێ هامدەمی داوەش کەرە
وەڵتەر چانەی بکشۆ جیایی بە وەیویروو ژاروو دووری
بۆ بە شیرەو جاموو بیەیت ئی دڵە شێتەی سەروەش کەرە
شوعەیب خالدی زاد
« چه‌نی مه‌رگی »
مــۆباره‌ک بـۆ ئه‌ی ته‌نیایـی سه‌روکارت چه‌نی مه‌رگی
وه‌ش ویارده‌ی و دڵــداری بی ، کاروبارت چه‌نی مه‌رگی
ژیوه‌ی پی گــر وه‌شیانه‌شــو ، لوا نه گوڵوەو سەروەشان
خه‌فه‌ت باری و بێ هام شانی ، بی به یارت چه‌نی مه‌رگی
تاقه‌تت بــۆ چی گه‌رمه‌ینـه ، سـه‌ختــه‌ن مــه‌زانونه ، به‌ڵام
فێنک مه‌وۆ ، گـه‌رمه‌ی مه‌کشـۆ ، لانسارت چه‌نی مه‌رگی
ئه‌گه‌ر ئه‌ومەو شانسی تاقـه‌ی ، نه‌سیبــۆبـی چی سفره‌ینه
دمایین تیکـه وه‌شـه‌ت مــه‌وۆ ، زه‌هره‌‌مارت چه‌نی مه‌رگی
ڕۆی ڕۆشنا ده‌سوپه‌نجه نه‌رم مه‌که‌ری چه‌نــی ڕه‌شـی
داخم چـوون بۆ ئه‌ی ته‌نیایـی شه‌وی تارت چه‌نی مه‌رگی
شوعەیب خالدی زاد
