هه ورامان/سیدعبدالمجید فخری

هورامان

هه ورامان پای کوش ده شت وجاره که ش

سه رکه شان وه ش توش باخ وجاره که ش

هه وای فه سلی وه ش وه هارش وه شه ن

وه نه شه ش چه نی گول هه ناره که ش

قه ل قه له بازی وسوره هه راله ش

قرپه ی وه رواوی پای لوجاره که ش

باخانی پای کوش نه قشی فیرده وسه ن

سه وزه ن، مه خمه له ن گردکوساره که ش

نه قشی سفیدی وه رواوی سه رکه ش

(مانی )مات که رده ن پای نگاره که ش

ئه شکوفه ی سه د ره نگ گه لای تازه ی باخ

ته خته وته لان وئه و جوجاره که ش

جاری گه نم وجوسواره ش وه تاو بو

چه نی وا وه شه ن سواره وغاره که ش

ئاوی چه مانی هورنیشته ی کوسار

مه واچی وینه ی چه م هه زاره که ش

هاژه ی ئاوی چه م قرپه ی دول نه گوش

ده م (ئسرافیله ن)هه م نه قاره که ش

وه شه ن ره حمه تی ئاسمان زه مینش

سه فای کوش هه وری نه عره داره که ش

گولان په ی سه مه ر گه نم وجو په ی به ر

په ی مایه ی حه یات که رون کاره که ش

په ی وه ختی وه رزی په روه رده ی سه مه ر

چون فه رهاد نه کون ئه و هیتیاره که ش

وه ختی زه رد مه وو له و جوش ودوجان

قولی هورکه رون داره داره که ش

ئه وه ن کو که نه ن جه کو هه م باخان

ره نج په ی گه نج ده ره ن ئه و باخ داره که ش

هه وای دله ی ته نگ ئه و سه ر کوی چه رمه

گیجه رول وه ش که رد په ی ئه خیاره که ش

بدیه یدی وه ره نگ هه ر جایی نه وعی

چه م حه یرانی چه م جووکه ناره که ش

وارانی به تاو خشه ی گه لای دار

عاشق کیشان باغ پای شه راره که ش

ده مای گه رمای ده م هه رده م دیاره ن

ئاوه خت مه وینیو ده م موغاره که ش

گه مه ی گونه لان مالای بانی په ر

په ی دوس سور دیاره ن سورهه راله که ش

((موخلیس))لای سه فای که ش وباخ وبه ر

سیای غه م پوشان په ی نازاره که ش

سه ید عه بدوالمه جید فه خری (موخلیس)  

12/3/88